Prokuroria e Posaçme kundër Korrupsionit dhe Krimit të Organizuar, këtë të enjte paraqiti në gjykatë kërkesën për kalimin për gjykim të çështjes penale ndaj të pandehurve Ardian Çopja (Çapja), Florenc Çapja, Olsi Leka (alias Jorgo Leku) alias Giorgo Lekou, Ervis Bardhi, Klajdi Dokoli e Etjen Cani.
Këta persona akuzohen per kryerjen e veprave penale “Vrasje në rrethana të tjera cilësuese”, “Prodhimi dhe mbajtja pa leje e armëve luftarake”, “Grup i strukturuar kriminal” dhe “Pjesëmarrje në grup të strukturuar kriminal”, të parashikuara nga nenet 79/dh, 278/2, 28/4, 333/a e 334 të Kodit Penal, për vrasjen e Nezir Beqiri e Gentjan Beqiri (babë e bir), ngjarje e ndodhur më datë 15 gusht 2012, në Elbasan, brenda në banesë të tyre (apartament në kat të pestë).
Më vete, Ardian Çapja akuzohet dhe për krimet “Mbajtja pa leje e arrmëve dhe municionit” dhe “Mbajtja pa leje e armëve të ftohta”, pasi gjatë arrestimit të tij iu gjet dhe sekuestrua në banesë një armë zjarri automatike kallashnikov, 60 fishekë dhe një bajonetë metalike, të cilat i mbante pa leje në banesë.
SPAK po ashtu bën me dije se në proçedimin penal nr.98 do vijohet të kryhen hetime për vepra penale të tjera të dyshuara të kryera më parë nga ky Grup i Strukturuar Kriminal./Opinion.al
