Ish – deputeti demokrat Bardh Spahia është shprehur se një numër i madh qytetarësh po humbasin jetën nga koronavirusi, por jashtë spitaleve.
Këto deklarata Spahia i bëri gjatë një interviste në abc neës, ndërsa tha se mjekët po i nxjerrin pacientët shumë më shpejt nga spitali, pa u rekuperuar plotësisht sepse duan të lirojnë shtretërit për pacientë të tjerë.
“Ka një numër të jashtëzakonshëm të vdekjeve të tjera që nuk kanë ndodhur në spitale. Janë vdekje nga Covid, që kanë shfaqur shenja. Në disa raste edhe janë faktuar nga tamponi pozitiv. Ka edhe nga ata që kanë dalë nga spitali dhe më pas kanë gjetur vdekjen. Këta duhet të klasifikohen vdekje Covid. Është e lidhur me sëmundjen Covid që ke kaluar. Një djalë i ri nga Gjirokastra vdiq rrugës kur doli nga spitali Covid nga një tromboemboli, nuk kishte sëmundje të tjera. Është një numër i jashtëzakonshëm i personave që kanë gjetur vdekjen pas daljes nga spitali. Ka një arsye pse ndodh. Tendenca për të qarkulluar me shpejtësi për të liruar shtretër. Është fakt tashmë që personat që humbin jetën pak ditë pas daljes nga spitali janë fakt për daljen me shpejtësi me qëllim lirimin e shtretërve”, tha Spahia.
