Ish-deputeti i PD, Bardh Spahia ka deklaruar se vetëvrasjet e pacientëve me Covid-19 vijnë si pasojë e dështimit të menaxhimit të situatës së pandemisë.
Në përgjigje të deklaratës së kryeministrit Edi Rama i cili në konferencën e sotme me gazetarët, përmendi shifrat e vetëvrasjeve në vendet e tjera të botës, Spahia ka ironizuar Ramën duke thënë se ka folur si “nekrolog” që nuk ka ndjesi humane.
“NEKROLOGU EDI RAMA!!! Edhe kur më në fund e mori mundimin të flasë për rastet e vetëvrasjeve në spitalet Covid, e bën si nekrolog e jo si minimumi NJERI, me ndjeshmëri a empati!
Nuk i ka ndjesitë bazike humane, e prandaj ka gërmuar vdekje dhe pacipësisht i përplasi në transmetim të drejtpërdrejtë TV!!! Mbresuese sesi sondazhet negative i kanë nxjerrë në pah në mënyrën më të turpshme hallin që e ka kapur nga humbja e karriges më 25 Prill. Dhe vazhdon të mos ketë asnjë plan, asnjë strategji për përballimin e COVID, ndërsa numri i infektimeve dhe viktimave është më i madh se raportimet ditore.
Vijon me të njëjtën metodë banale duke sharë e fyer si gangster rrugësh këdo që i përplas realitetin e kolapsit ku e ka futur sistemin shëndetësor. Fyen këdo: gazetarë, politikanë, institucione, qytetarë, këdo që ia thotë hapur atë që provon çdo individ që ka patur eksperiencën e vështirë të infektimit me COVID. Duke filluar që tek kostoja prej 1 milionë e 500 mijë lekësh e trajtimit”, shkruan Spahia .
Gjithashtu, ish-deputeti shton se qeveria ka detyrim ligjor t’ua garantojë falas trajtimin pacientëve të infektuar me COVID-19.
“Me ligj, qeveria ka detyrimin t’ua garantojë falas trajtimin e një sëmundje infektive si Covid-19, por Edi Rama nuk e bën këtë, sepse taksat që qytetarët paguajnë për shëndetësinë ua jep oligarkëve të koncesioneve e tenderave sekretë.
E ka detyrim ligjor t’ua rimbursojë trajtimin si në banesa, ashtu edhe në të gjitha strukturat shëndetësore, prej ditës së parë të shfaqjes së kësaj epidemie. Por hesht duke shkelur ligjin dhe braktisur qytetarët në ditët më të vështira, kur kostoja e kësaj papërgjegjshmërie është vetë jeta e njeriut.
Ka vetëm hallin e karriges dhe çoroditja mendore i ka dalë në pah, duke sharë e shkumëzuar ndaj gjithkujt, sepse sondazhet ia thonë realitetin: shqiptarët nuk e besojnë më dhe mezi po presin 25 Prillin për ta larguar!”, –tha Spahia./ Opinion.al
