Katër astronautët amatorë tashmë kanë zbritur në tokë pas tre ditësh në hapësirë. Ata janë ekipi i parë privat, tërësisht civil që udhëtoi në orbitën rreth Tokës.
Ekuipazhi i Inspiration4 u nis me një kapsulë SpaceX nga Florida të Mërkurën dhe zbarkoi të Shtunën në brigjet e shtetit pas orës 19:00 me kohën lokale.
Katër parashuta ngadalësuan shpejtësinë e zbritjes së kapsulës para se të zbriste në ujë, ku anijet e SpaceX vrapuan për ta tërhequr atë.
Ekipi i Inspiration4 u drejtua nga miliarderi Jared Isaacman, shef ekzekutiv i Shift4 Payments, i cili veproi si “komandant” i misionit.
Ai kishte paguar sipas revistës Time rreth 200 milionë dollarë (145 milionë paund) – miliarderit Elon Musk për të katër vendet në bordin e Creë Dragon.
Isaacman u shoqërua nga 3 persona që nuk i njihte, por të cilit i kishte zgjedhur vetë, ish-kandidatja e NASA-s për astronaut Sian Proctor, fizikantja Hayley Arceneaux dhe inxhinieri Chris Sembroski.
“Ishte një udhëtim i mirë për ne,” tha Isaacman me radio menjëherë pas uljes. “Ne sapo kemi filluar”.
Udhëtimi shënon herën e tretë që kompania e Elon Musk dërgon njerëz në hapësirë dhe një tjetër moment historik në tregun e turizmit hapësinor.
“Urime @Inspiration4x !!!”, postoi ai në Twitter pas kthimit të sigurt ekuipazhit.
“Mirësevini në epokën e dytë të hapësirës”, tha drejtori i misionit Todd Ericson në një konferencë për shtyp, duke theksuar se pas kësaj, “udhëtimet në hapësirë bëhen shumë më të arritshme”./Opinion.al
