Cape Canaveral, Florida – Raketa Falcon 9 e SpaceX u ngrit mbrëmë në Kennedy Space Center të NASA-s në një mision të paparë të dytë për të dërguar një satelit në orbitë, duke dëshmuar ripërdorimin e raketës.
“Kjo është një ditë e mrekullueshme për industrinë e hapësirës”, ka thënë CEO i SpaceX, Elon Musk menjëherë pasi raketa u kthye poshtë.
“Kjo do të thotë që ju mund të fluturoni dhe të fluturoni përsëri me të njëjtin ngritës të raketës në orbitë, e që është pjesa më e shtrenjtë e raketës. Ky do të jetë në fund të fundit një revolucion i madh në fluturimet në hapësirë”, përfundoi Musk, raporton Space.com.
Ky lansim do të ishte krejt i zakonshëm sikur mos të bëhej fjalë për një detaj që në fakt nënkupton revolucion në industrinë hapësinore. Fjala është për ripërdorimin e raketës që ka një kosto shumë të madhe, që në rastin e Falcon 9 sillet rreth 35 milionë dollarë.
Për të kuptuar se për çka bëhet fjalë merret shembulli i udhëtimeve me Aeroplan. A mund të mirret me mend se sa shtrenjtë do të ishin biletat e udhëtimit për udhëtarët nëse aeroplani do të hidhej në oqean pas përfundimit të udhëtimit. Pra dhjetëra apo qindra milionë dollarë do të hidheshin në oqean pas secilit fluturim dhe aeroplani do të ishte i papërdorshëm. Kështu ka qene edhe me raketat që hedhin objekte në hapësirë.
Pasi qe hidhnin objektet e parapara në hapësirë, raketa kthehej në tokë duke u përplasur në oqean dhe duke humbur dhjetëra apo edhe qindra milionë dollarë. Me teknikën e re të SpaceX tani fillon epoka e re që do të inicojë revolucion të paparë në këtë fushë pasi kjo kompani ka arritur që të zotërojë teknologjinë e kthimit të kontrolluar të raketës pasi që ka hedhur në hapësirë objektet që kishte në plan.
Raketa Falcon 9 që fluturoi mbrëmë ne hapësirë kishte fluturuar edhe vitin e kaluar dhe ishte kthyer në mënyre të kontrolluar në një platofrmë në oqean dhe pastaj ishte dërguar në ambientet e kompanisë ku ishte bërë gati për fluturimin e dytë i cili rezultoi me sukses dhe përseri u kthye në mënyrë të kontrolluar në platofrmën oqeanike “Of Course I Still Love You”, duke realizuar kështu ëndërrën e shefit të SpaceX, Elon Musk, ndonëse askush nuk kishte besuar në një operacion të tillë ekstremisht kompleks, duke e quajtur si të pamundshëm.
Me arritjen e ripërdorimit të raketave, do të ketë ulje drastike të çmimeve për vajtje ardhje në hapësirë duke hapur mundësi të mëdha në fushën e teknologjive, eksplorimit të hapësirës, planeteve, apo edhe shfrytëzimit të rezervave enorme të metaleve të shtrenjta në asteroidë, ku vetëm njëri prej tyre është vlerësuar se ka rezerva të platiniumit në vlerën e 5.000 miliardë dollarëve apo më shumë se një e treta e tërë bruto prodhimit vendor në SHBA./GazetaExpress/
