Partia Demokratike ka bërë disa protesta masive kundër kryeministrit Rama, por si asnjëherë tjetër ato nuk janë veshur me kaq mister sa kjo e 18 shkurtit. Është lajmëruar se protesta do nisë në orën 12:00 përpara godinës së Kryeministrisë dhe synimi i saj është fillimi i një lëvizjeje që do të garantojë zgjedhje të lira dhe të ndershme.
Në një thirrje të fundit për pjesëmarrje, Lulzim Basha foli për një vendim të madh.
“Jam i bindur se e nesërmja do të jetë një festë gjigante demokracie, shprehja më e drejtpërdrejtë e vullnetit të qytetarëve për t’i dhënë fund së keqes, për të marrë së bashku një vendim të madh nesër për zgjedhje të lira dhe të ndershme, që do ta marrim së bashku aty, të gjithë së bashku, të gjithë qytetarët”, tha Basha.
Me sa duket, demokratët e lidhin këtë vendim me një përpjekje për të detyruar kryeministrin Rama të japë dorëheqjen. Ata e akuzojnë kryeministrin për një mungesë vullneti për të garantuar zgjedhje të lira dhe të ndershme.
Në thirrjen publike të PD drejtuar qytetarëve thuhet: “Ka 1 milionë halle në Shqipëri. 1 milionë arsye për të ngritur zërin: varfëri, papunësi, shëndetësi e rrënuar, arsim në udhëkryq, korrupsion, krim, kaos, braktisje dhe arrogancë në qeverisje. Le të ngrihemi bashkë më 18 shkurt për të filluar një lëvizje, që do të garantojë zgjedhje të lira dhe do t’u kthejë pushtetin njerëzve.”
Në lidhje me protestën e sotme, 18 shkurt 2017, është bërë e ditur vetëm nisja e saj, se çfarë do ndodhë më pas, i mbetet orëve në vazhdim…
Megjithatë një vendim është marrë, kreu i PD-së Lulzim Basha ka theksuar se protesta do të jetë masive, por paqësore.
Gjatë gjithë këtyre ditëve, kryetari i PD-së ka shkuar vetë qytet më qytet ër të bashkëbiseduar me njerëzit dhe ftuara që t’i bashkohen asaj që ai e quajti “një bashkim i madhe.”
“Protesta është bashkimi me i madh i qytetarëve kundër padrejtësisë, kundër keqqeverisjes, kundër varfërisë. Do të marrin pjesë të gjithë qytetarët, gra, burra, të reja, të rinj, pensionistë, familjarë, studente, gjimnaziste dhe intelektuale, njerëz të artit, kulturës e sportit, të papunë e sipërmarrës, fermerë dhe punëtore. Nga ky bashkim i madh kanë frikë vetëm ata që duan ti mbajnë shqiptarët të nënshtruar. Ndaj kanë filluar të shpifin e të gënjejnë për protestën. Mos i besoni tamtamet e qeverisë, mos i besoni ata që kanë katër vjet që ju gënjejnë për punësimin, për shëndetësinë falas, për mirëqenien tuaj. Ejani në protestë bashkë me familjarët tuaj, siç do bëjmë të gjithë. Forca jonë nuk është dhuna, por bashkimi, kurajo dhe ëndrrat që kemi për të ardhmen”, u shpreh Basha.
