Volodymyr Zelensky udhëton sot për në Shtëpinë e Bardhë, pas takimit të fundit Trump-Putin në Alaska.
Zelensky nuk do jetë vetë por i shoqëruar nga udhëheqës të lartë evropianë, në një përpjekje vendimtare për të parandaluar imponimin e një zgjidhjeje që do të kërkonte lëshime territoriale nga Kievi.
Këtë herë presidenti ukrainas mbërrin në Uashington me mbështetje të fortë evropiane, krejt ndryshe nga vizita e tij e parë në shkurt, gjatë së cilës ai u përball i vetëm me një surprizë nga Donald Trump dhe Zëvendëspresidenti J.D. Vance.
Zelensky do të shoqërohet nga kryeministri britanik Keir Starmer , kancelari gjerman Friedrich Merz dhe presidenti francez Emmanuel Macron , një grup udhëheqësish që kombinojnë fuqinë ushtarake dhe ekonomike me një histori marrëdhëniesh të mira me Trump.
Gjithashtu, ai do të shoqërohet nga Presidentja e Komisionit Ursula von der Leyen, kryeministrja italiane Giorgia Meloni, Presidenti finlandez Alexander Stubb, si dhe Sekretari i Përgjithshëm i NATO-s, Mark Rutte
Sipas njoftimit të administratës amerikane, takimi bilateral Trump–Zelensky do të mbahet në orën 13:15 sipas kohës lokale (19:15 me orën e Evropës). Në orën 14:15, presidenti amerikan do të përshëndesë liderët evropianë.
15 minuta më pas është planifikuar fotoja zyrtare e grupit, ndërsa në orën 15:00 (21:00 me orën e Evropës) nis takimi i madh.
Ky samit shihet si një moment kyç për të kuptuar nëse Uashingtoni, Kievi dhe kryeqytetet evropiane do të afrohen drejt një procesi paqeje apo nëse ndasitë me Moskën do të thellohen edhe më shumë.
