Pas pushimeve të fundvitit, Kuvendi do të nisë sot punën duke u mbledhur në seancën e parë të vitit 2020 në orën 17:00.
Sipas urdhrit të kreut të Kuvendit, Gramoz Ruçi në këtë seancë të parë pritet të miratohet programi i punës për periudhën 20 janar – 6 mars dhe miratimi i kalendarit 3-javor të punimeve që përkon me datat 20 janar – 7 shkurt.
Megjithatë janë një sërë çështjesh të cilat kanë interes të gjerë dhe që janë paralajmëruar në fund të dhjetorit.
Kryeministri Rama ka thënë se brenda janarit Kuvendi do të votojë aktin normati ‘anti-KÇK’ dhe kjo pritet të sjellë një debat mes palëve për shkak të kontestimeve të shumta që ka patur lidhur me kompetencat e reja që parashikon ky akt normativ për njësinë speciale të re të policisë.
Por një çështje tjetër me interes që ka gjetur dakordësinë e palëve është ajo e Reformës Zgjedhore. Gjatë seancës deputetët pritet të mbajnë qëndrimet e tyre për këtë çështje që mendohet se mund ti japë fund krizës politike.
Përplasja Kuvend – Presidencë pritet të ketë zhvillime të reja pasi Presidenti Meta ktheu në Kuvend për rishikim paketën ‘anti-shpifje’ të cilën deputetët e PS paralajmëruan se do ta kalonin përsëri ashtu siç ishte. Nga ana tjetër Komisioni Hetimor për shkarkimin e Presidentit vijon punën me objektin e hetimit të zgjeruar tashmë edhe në lidhje me veprimet e Metës në procesin e emërimit të anëtarëve të Gjykatës Kushtetuese. /Opinion.al
