Këtë të shtunë në orën 12:00 pritet të zhvillohet protesta e thirrur nga ish-kryeministri, Sali Berisha para selisë blu.
Berisha dhe mbështetësit e tij kërkojnë nga Lulzim Basha që të lirojë selinë pas Referendumit të 18 Dhjetorit, i cili votoi për shkarkimin e tij si kryetar i PD-së.
Ndërkohë vetë Berisha ditën e djeshme në një deklaratë para selisë së PD tha se në protestën e sotme do të hapen dyert e selisë së demokratëve, e cila prej disa ditësh qëndron e mbyllur për mbështetësit e liderit historik të demokratëve por gjithashtu nuk është lejuar as prania e mediave.
Kujtojmë se në media kanë dalë foto të dyerve të blinduara brenda ndërtesës së selisë së PD.
Por edhe pse Berisha dhe mbështetësit e tij do të zhvillojnë protestë, për Lulzim Bashën dita e sotme do të jetë një ditë normale pune. Sikurse raportohet ai ka shkuar në seli që në orët e para të mëngjesit të sotëm, ndërsa ka planifikuar të zhvillojë mbledhje me kolegjin e kryetarëve dhe më pas do të mbledhë kryesinë e PD./Opinion.al
