Ditën e sotme Shqipëria do të nisë fushatën e vaksinimit kundër COVID-19. Lidhur më vaksinimin ka reaguar mëngjesin e sotëm në“Facebook” kryeministri Edi Rama, i cili shprehet se tashmë me vaksinën anti-covid pritet që lufta me armikun e padukshëm të shkojë drejt fundit.
Në postimin e Ramës, është publikuar një kronikë e përgatitur për “ERTV”, e cila lexohet nga ministrja e Shëndetësisë, Ogerta Manastirliu. Ajo tregon me shumë kujdes arritjet që qeveria ka bërë në përballjen e pandemisë.
Nën tingujt e qetë të muzikës që shoqërojnë kronikën, Manastirliu thekson se Shqipëria ka mundur të përballet me sukses me COVID-19. Po ashtu, në kronikë janë futur sinkrone të mjekëve të cilët përgëzojnë qeverinë për arritjet që ka bërë në kohë pandemie në sistemin e shëndetësisë.
Kujtojmë se vaksinën Pfizer/BioNTech fillimisht do ta marrin mjekët, më pas të moshuarit.
Postimi
Mirëmëngjes dhe pak orë nga nisja e fushatës së vaksinimit #ShqipëriaBuzëqesh duke ju marrë pak minuta nga koha juaj, për të hedhur vështrimin pas në orët, minutat, ditët, javët e muajt e jashtëzakonshëm të luftës me Armikun e Padukshëm, e cila sot hyn në fazën e ofensivës së madhe për largimin e tij përfundimtar nga jeta jonë, ju uroj një javë të mbarë./ Opinion.al
