Sot në Gjykatën e Apelit të Shkodrës mbahet seanca për 11 kuksianët që mbahen në burg prej 1 Prillit. Ata kërkojnë lirinë në Apel, pasi Gjykata e Kukesit i la ne arrest me burg. Sot në gjyq do të jenë deputetë të partive opozitare, por dhe perfaqësues nga shoqëria civile. Deputeti i Partisë Demokratike, Bardh Spahia, ka bërë thirrje për një protestë ara Gjykatës së Apelit në qytetin e Shkodrës. Ndërkohë ai ka paralajmëruar se të gjithë deputetët e djathtë do të jenë të pranishëm në këtë tubim për të shprehur mbështetjen kuksianëve të arrestuar dhe për të ngritur zërin kundër gjyqeve politike- siç shprehet deputeti i PD-së.
“Nderi dhe tradita e Shkodrës e don që të jemi sa më shumë dhe të reagojmë sa më fort në mbështetje të tyre dhe kundër gjyqeve politike të cilat na kujtojnë kohët më të errëta të Shqipërisë dhe me të cilat Shkodra dhe shkodranët nuk janë pajtuar as gjatë diktaturës më të egër. I gjithë grupi parlamentar i PD-së do jetë aty. Sytë, mendja dhe zemra e çdo demokrati kudo ku ndodhet nesër do jenë në Shkodër. Le të jemi sa më shumë nesër në orën 10.00 tek Gjykata e Apelit”, shkruan Spahia në një status në rrjetin social Facebook.
23 kuksianë u arrestuan pas protestës së mbajtur më 31 mars pranë tunelit të Kalimashit në Kukës, kundër një tarife të dyfishtë që qeveria vendosi për kalimin në Rrugën e Kombit. Taksa prej 5 euro për çdo kalim është e papërballueshme për kuksianët, konsideruar qarku më i varfër në Shqipëri. Por protesta përshkallëzoi edhe në dhunë që çoi në djegien e sporteleve të koncensionarit të Rrugës së Kombit, që u ngritën për pagesën e tarifës. Protestuesit e tjerë u liruan ndërsa 11 kuksianë prej asaj dite qëndrojnë ende në burg.
