Kreu i Partisë Demokratike, Lulzim Basha do të mbledhë sot kryesinë në një mbledhje ku pritet të merret vendimi për mënyrën e përzgjedhjes së kandidatëve
“Me mbështetjen dhe ndihmën e vyer të Institutit Ndërkombëtar Republikan (IRI), pranë Partisë Republikane të SHBA dhe të Partisë Konservatore Britanike e Fondacionit Uestminster për Demokracinë kemi garantuar parimet dhe rregullat për përfshirjen e drejtpërdrejtë të anëtarësisë në propozimin dhe përzgjedhjen e kandidatëve.
Një ditë përpara këtij vendimi të rëndësishëm, pata kënaqësinë të falenderoj gjatë një videokonference z. David Jones, Drejtuesin e Panelit Parlamentar për Vlerësimin e Kandidatëve në Partinë Konservatore Britanike dhe z. Thibault Muzergues, Drejtor i Programit për Europën në Institutin Ndërkombëtar Republikan për ndihmën e çmuar që na kanë dhënë në këtë rrugëtim sfidues.
Miqtë tanë ndanë me mua sot besimin se modeli që do të miratojmë nesër në kryesinë e Partisë Demokratike, do të kontribojë për demokratizimin e jetës politike dhe duhet të jetë shembull edhe për partitë e tjera në vend.”- shkruan Basha në Facebook.
Ky vendim sipas kreut demokrat është “i rëndësishëm për shoqërinë dhe politikën shqiptare” dhe ushtrimi “më i madh demokratik që ndonjë parti politike ka bërë ndonjëherë në Shqipëri.”
Në një mbledhje të shkuar të kryesisë së PD, Basha propozoi që kandidatët për deputetë dhe kryetar bashkie të PD të zgjidhen me parimin një anëtar një votë nga kryesia.
Ende nuk dihet nëse do të jetë ky propozimi që pritet të merret sot nga selia blu.
Pas mbarimit të gjendjes së fatkeqësisë natyrore, dy forcat kryesore politike PS dhe PD filluan të organizohen për zgjedhjet e ardhshme politike. /Opinion.al
