Sot Edi Rama është simbol i tradhtisë së të vetëve dhe shqiptarëve, deklaroi Lulzim Basha nga çadra e lirisë duke komentuar votimin për Presidentin.
“Tradhëtia është sot fjala që u shkon ndër mend shumicës dërrmuese të një pjesë të shqiptarëve me bindje të majta, që më kot besonin dhe shpresonin se Edi Rama e ka me të vërtetë kursin e reformave në Shqipëri… Këtu është katandisur demokracia fasadë me kupolën e Edi Ramës dhe Ilir Metës. Këtu ka përfunduar posti i Presidentit të Republikës që pasi i hoqën me ligj çdo kompetencë dhe e shndërruan në një zyrë me më pak fuqi veprimi se drejtori i postës në Vlorë, tani e trajtojnë si një rifuxhio, si një plaçkë për të kënaqur orekset e njëri-tjetrit dhe për të mbyllur pazarin e pisët me anë të të cilit mendojnë se do të asgjesojnë demokracinë shqiptare”, u shpreh ai.
70 ditët protestës në çadër sipas tij kanë bindur dhe më skeptikët se kauza e opozitës është e drejtë.
“Se Shqipërinë, Edi Rama e do për plaçkë, zgjedhjet i do për fasadë, opozitën e do për alibi, që të vazhdojë pazaret për të nxjerrë në treg gjithçka ky vend ka. Zyra, funksione, ministrat, Presidentin, gjithçka, përveç karrikes së tij me të cilën ka lidhur pazgjidhshmërisht ekzistencën politike në bashkëpunim me krimin dhe drogën”.
Një ditë para skadimit të afatit për regjistrimin e kandidatëve për deputetë, Basha përsëriti me këmbëngulje kërkesat e opozitës për qeveri teknike për zgjedhjeve të lira, duke zbatuar dekriminalizimin, duke luftuar drogën dhe për reformë zgjedhore me votim dhe numërimin elektronik. Që në orën e parë të qeverisë teknike ai premtoi se vetingu do të votohet.
“Vetingun që bën sikur e do, por që i trembet, i trembet si vampiri dritës së Diellit”.
Duke mos pranuar këtë Rama po kërkon të fusë vendin në rrugë qorre, çfarë opozita e bashkuar nuk do ta lejojë, deklaroi Basha.
“Zoti është me të drejtën. Zoti është me shqiptarët. Zoti është me Shqipërinë. Fitorja po afron”.
