Sot pritet të mblidhet seanca plenare pa opozitën e cila është në protestë dhe në bojkot në pritje të negociimit për qeveri teknike. Kryetari, Lulzim Basha njoftoi dje se të gjithë deputetët e opozitës do të mblidhen dhe do të flasin nga çadra e lirisë. Ai ftoi edhe deputetët e tjerë të mazhorancës që ti bashkohen. “Ppërveç 19 njerëzve të Ramës me rekorde kriminale”, cilësoi ai.
“Grupi Parlamentar i Partisë Demokratike do ta bëjë seancën parlamentare këtu, me qytetarët. Deputetët e opozitës do të jenë të gjithë këtu. Këtu është vendi për çdo deputet tjetër të majtë që nuk është i lidhur me krimin që nuk i ka borxh këtij populli, i siguroj se qytetarët do t’i respektojnë nëse vendosin të jenë pjesë e këtij Parlamenti të vërtetë. Kush është me popullin të vijë te populli. Kush është me krimin të rri atje deri sa populli t’i nxjerrë”, tha Basha.
Ndërsa punimet e parlamentit sot pritet të zgjasin shumë pak pa opozitën. Në rendin e ditës janë: Projektligj “Për të drejtat dhe mbrojtjen e fëmijës” me votim të thjeshtë; Projektvendimi “Për miratimin e Kodit të Sjelljes së Deputetëve të Kuvendit të Republikës së Shqipërisë”; Projektligji “Për organizimin dhe funksionimin e profesionit të rregulluar të ekspertit fiskal dhe institutin e ekspertëve fiskalë”.
