Filantropi dhe ish financieri Xhorxh Soros ka njoftuar se ai do të dhurojë 1 miliard dollarë për të financuar një rrjet të ri global universitetesh të krijuara për të promovuar vlerat liberale dhe vizionin e tij për një shoqëri të hapur.
Në atë që ai e quajti si “projekti më i rëndësishëm dhe më i qëndrueshëm i jetës sime”, Soros tha se ishte e rëndësishme të financohen institucionet që do të ndihmojnë t’i rezistojnë rrëshqitjes drejt autoritarizmit në rritje në SHBA, Rusi dhe Kinë. Ai gjithashtu nisi një sulm të ri ndaj Donald Trump, duke e quajtur presidentin amerikan “narcisistin e përkryer”.
Soros, duke folur në Forumin Ekonomik Botëror në Davos, tha se Rrjeti i tij i ri i Universiteteve të Shoqërisë së Hapur (RUSHH) do të ndërtohej në Universitetin e tij të Europës Qëndrore (UEQ), i ngritur pas rënies së komunizmit 30 vjet më parë.
UEQ është detyruar të transferohet nga Hungaria në Vjenë pasi udhëheqësi i djathtë i Hungarisë, Viktor Orban, i hoqi mundësinë e lëshimit të diplomave amerikane.
Soros tha se UEQ nuk kishte qenë aq i fortë sa vetvetiu të bëhej institucioni arsimor që kërkon bota. “Kjo kërkon një lloj të ri të rrjetit arsimor global.”
Ai shtoi se kishte ardhur koha që Fondacioni i tij i Shoqërisë së Hapur të fillonte një projekt ambicioz që do të ndërtohej në UEQ dhe do të zhvillonte “një rrjet arsimor të ri dhe inovativ që bota me të vërtetë ka nevojë”.
Soros tha: ” RUSHH do të jetë unik. Do të ofrojë një platformë ndërkombëtare për mësimdhënie dhe kërkime. Në fazën e parë do të lidhet më afër së bashku një rrjet ekzistues. Në fazën e dytë, ne do ta hapim këtë rrjet për institucione të tjera që duan të anëtarësohen dhe janë të etur dhe të kualifikuar për ta bërë këtë.
“Për të demonstruar angazhimin tonë ndaj RUSHH, ne jemi duke kontribuar një miliard dollarë për të. Por ne nuk mund të ndërtojmë një rrjet global të vetëm; ne do të kemi nevojë për institucione partnere dhe mbështetës nga e gjithë bota për të na u bashkuar në këtë ndërmarrje. ”
Soros tha që ndërsa situata politike ishte mjaft e rëndë, do të ishte gabim t’i dorëzohej dëshpërimit. Ai sulmoi Trump, për të cilin ai tha se ishte një “marifetxhi dhe narcisisti i përkryer që dëshiron që bota të sillet rreth tij”.
“Kur fantazia e tij për t’u bërë president u bë realitet, narcizmi i tij zhvilloi një dimension patologjik. Në të vërtetë, ai ka shkelur kufijtë e imponuar për presidencën nga kushtetuta dhe është futur në proces shkarkimi për këtë”, tha ai. /Opinion.al
