Ambasadori i Bashkimit Europian, Luigi Soreca ka reaguar për vrasjen e 25-vjeçarit, Klodian Rasha përmes një postimi në rrjetet sociale.
Ndërsa u shpreh se duhet të shmangen aktet e dhunës nga të gjitha palët, Soreca kërkoi hetimin e plotë të vrasjes së të riut nga ana e efektivit Nevaldo Hajdaraj.
“Shumë i trishtuar për zhvillimet e ditëve të fundit. Mendimet e mija janë në këto momente me familjarët e Klodian Rashës. Tashmë është shumë e rëndësishme që kjo ngjarje tragjike të hetohet në mënyrën e duhur dhe drejtësia të vendoset dhe që shqetësimet e shprehura në mënyrë paqësore të dëgjohen. Por dhuna duhet të shmanget nga të gjitha palët”, shkruan Soreca.
Kujtojmë që, dita e tretë e protestës së zhvilluar nga qytetarët për vrasjen e të riut ka filluar me tensione e përplasje të policisë me protestuesit./Opinion.al
