Ambasadori i Bashkimit Europian në Tiranë, Luigi Soreca kërkoi miratimin e marrëveshjes së 5 qershorit për Reformën Zgjedhore duke e konsideruar këtë të fundit kusht kyç për fillimin e negociatave.
Duke folur nga Vlora, Soreca tha se marrëveshja e 5 qershorit u arrit pas një procesi gjithëpërfshirës dhe duhet votuar sa më shpejtë që t’i hapë rrugë krijimit të iniciativave që parashikon.
Ai komentoi gjithashtu edhe ndryshimet kushtetuese të propozuara. Soreca tha se ato nuk janë pjesë e rekomandimeve të ODIHR dhe se bazuar në rekomandimet e Komisionit të Venecias, ndërhyrjet në Kushtetutë kërkojnë diskutimet e duhura.
“Bashkimi Europian e ka mirëpritur atë marrëveshje që u arrit në datën 5 qershor, ka qenë një proces gjithpërfshirës. Tashmë është thelbësore që kjo marrëveshje të miratohet shumë shpejt. Ky është prioriteti i parë, sepse marrëveshja parashikon edhe iniciativa sikurse është krijimi i komisionit qendror dhe gjëra që duhet të ndodhin shpejt. Prandaj ne ftojmë parlamentin që ta miratojë këtë marrëveshje shpejt. Reforma Zgjedhore është një kusht kyç për të filluar negociatat e anëtërësimit. Pa këtë kusht Shqipëria nuk mund të fillojë konferencën e parë ndërqeveritare, ndaj ky kusht duhet të përmbushet patjetër. Ne kemi parë edhe disa ndryshime shtesë të ashtuquajtura ndryshime kushtetuese. Këto nuk janë pjesë e rekomandimeve të OSBE/ ODIHR, janë jashtë tyre që u kërkuan edhe nga Këshilli i BE. Gjithashtu, ne kemi parë sipas rekomandimeve nga Këshilli dhe Komisioni i Venecias se këto ndryshime do të kërkonin diskutimet e duhura. Ne inkurajojmë palët të vazhdojmë diskutimet dhe dialogun në të njëjtën frymë që u tregua gjatë miratimit të marrëveshjes së datës 5 qershor.”, tha Soreca. /Opinion.al
