Pas përfundimit të takimit me kreun demokrat Lulzim Basha, ambasadori i Bashkimit Europian në Shqipëri Luigi Soreca ka dhënë një prononcim të shkurtër për mediat. Ai ka thënë se shpreson që nesër të mos ushtrohet dhunë gjatë protestës së opozitës.
“Kam qenë shumë i qartë, i kemi shprehur liderit të PD-së qëndrimin tonë. Është e nevojshme që të diskutohet. Mendoj se nesër është një ditë e rëndësishme, ne presim të mos ketë dhunë dhe të ndiqen proceset demokratike”, është shprehur Luigi Soreca.
Ambasadori nuk ka dhënë detaje të tjera nga takimi me Lulzim Bashën. Gjithsesi, ai dje është shprehur se djegia e mandateve është një vendim që nuk ndihmon në perspektivën europiane të Shqipërisë. Para tij, në selinë e PD-së ishte edhe ambasadorja gjermane Susanne Schutz.
Sot në orën 17:00 pritet të mblidhet Këshilli Kombëtar i Partisë Demokratike, i cili do të vendosë zyrtarisht për djegien e mandateve.
