Sonte në“Opinion”: Dorëheqja e ministrit Naço dhe video-dëshmia mbi kontrabandën e cigareve në dogana

Sonte në “Opinion” do të diskutohet dorëheqja e ministrit të Drejtësisë Nasip Naço. Cilat ishin arsyet që e çuan Nasip Naçon drejt dorëheqjes? A ishte dorëheqja e Naços një sinjal i Metës drejt Ramës, për të kryer ndryshime të reja në kabinet? A ishte imponimi i figurës së Ylli Manjanit si ministër i Drejtësisë, një tregim muskujsh i Metës ndaj Ramës? Këto dhe shumë pyetje të tjera do të jenë në qendër të bisedës në “Opinion” ku të ftuar do të jenë analistët Andrea Stefani, Agron Gjekmarkaj, Artan Hoxha dhe Lorenc Vangjeli. Pjesa e dytë e “Opinion” i kushtohet video-dëshmisë së doganierit Ilir Çela në Durrës i cili akuzon drejtëpërdrejt drejtorin e doganës Durrës për implikim në kontrabandën e cigareve. Sipas ish-doganierit sabotimi niste që nga aktkontrollet që kryeshin. Ja një nga dëshmitë që do të dëgjoni sonte në mbrëmje e cila tregon se si kryhet kontrabanda. “Një rast flagrant është në terminalin e Tiranës, që ishte ditë e shtunë dhe Croën Agents do të kontrollonte një kontenier ditën e hënë sepse të shtunën mbyllej më shpejt puna dhe të dielën ishte pushim. Dhe të hënën kur erdhën anglezët kontenieri kishte mbaruar kontrollin dhe kishte dalë, se kush e kishte bërë kontrollin nuk u mor vesh. Dhe ky është një rast për të cilin është vënë në dijeni edhe kryeminsitri sepse i ka shkuar raporti nga britanikët.”