Ekzistojnë shumë pak shanse që qeveria shqiptare të reagojë në lidhje me organizatat kriminale që ushtrojnë veprimtarinë e tyre në vendin tonë, pavarësisht deklaratës së ashpër që ambasadori amerikan, Donald Lu bëri ditën e sotme.
Ky është rezultati i sondazhit të mbrëmjes në Opinion.al, ku mbi 60 përqind e votuesve mendojnë se qeveria shqiptare nuk do reagojë pas deklaratës së Lu bërë ditën e sotme. Ndërsa, (23.92%) e tyre mendojnë se autoritetet shqiptare do reagojnë. Një shifër e papërfillshme, rreth (15.28%) e votuesve nuk kanë dijeni rreth kësaj çështjeje.
Ambasadori i SHBA-së në Tiranë, Donald Lu, foli direkt dhe ashpër për një problem që po mban pezull vëmendjen publike për më shumë se dy javë.
Lu i është referuar krimit të organizuar dhe fuqizimit që ky i fundit ka marrë këto vite për shumë arsye, por ajo më kryesorja, tolerimi prej politikës ose lidhjet e saj me të!
Lu ka deklaruar se në vend veprojnë më shumë se 20 grupe kriminale dhe katër klane kryesore. Ai ka shtuar se trafiku i drogës drejtohet edhe nga burgjet dhe ka bërë edhe një herë përgjegjëse drejtësinë për shumë nga problemet që ndodhin në këtë vend.
