Demokratët mendojnë se opozita shqiptare në drejtimin e Lulzim Bashës, duhet të jetë agresive për katër vitet e ardhshme qeverisje socialiste.
Ky është rezultati i sondazhit të mbrëmjes në Opinion.al, ku (56.90%) e votuesve mendojnë se duhet të jetë agresive. Ndërsa, (32.30%) i përkasin mendimit se ajo duhet të jetë e moderuar. Dhe vetëm (10.80%) e votuesve janë të paqartë për kursin që opozita shqiptare duhet të mbajë.
Për herë të parë pas humbjes në zgjedhjet e 25 qershorit, kryetari i Partisë Demokratike Lulzim Basha ka folur sonte në emisionin “Opinion” në Tv Klan për situatën në të cilën ndodhet opozita shqiptare.
Duke ju referuar kritikave të forta të ish-Kryeministrit Sali Berisha në emisionin “Fakt” ditën e djeshme, Basha e quajti intervistën analitike dhe racionale.
Kryedemokrati u shpreh se deklaratat dhe kritikat e Berishës shërbejnë për të bërë një analizë dhe reflektim për gjendjen e opozitës dhe Partisë Demokratike.
“E kam lexuar të plotë intervistën e tij. Është një intervistë që shpreh shqetësime të drejta për gjendjen e Shqipërisë, për situatën e opozitës dhe Partisë Demokratike që shërbejnë për një reflektim për hapat që do të hedhim duke filluar që nga kjo javë për t’i dhënë vendit një opozitë siç e meriton. Ka kaq shumë çështje të rënda që meritojnë vëmendjen akute saqë nuk mund të ketë luksin Shqipëria të gatuajë skenare. Sali Berisha ka qenë shkolla politike e këtij vendi në 27 vite”, tha Lulzim Basha.
