(Foto ilustruese)
Grupet kriminale të trafikut të drogës në vendin tonë kanë lidhje me politikën.
Ky është sondazhi i mbrëmjes sotme në Opinion.al, ku mbi tetëdhjetë përqind e votuesve mendojnë se politika ka lidhje me grupet kriminale të trafikut të drogës.
Ndërsa një rezultat i vogël, rreth nëntë përqind e votuesve mendojnë se mes politikës dhe krimit nuk ka lidhje.
Dosja italiane e përgjimit të grupit kriminal të Habilajve ka tronditur jo pak politikën shqiptare, por edhe opinionin publik.
Në dosjen me 416 faqe të prokurorisë italiane, del disa herë emri i ish-ministrit të Brendshëm Saimir Tahiri.
Fillimisht flitet mes Moisi Habilajt dhe Sabaudin Çelajt që thonë se “çfarë ka Tahiri më shumë se ata përveç emrit dhe pozicionit”.
Habilaj thotë në përgjime se Tahiri nuk ka më shumë para se ata megjithëse llogarit se në një muaj Tahiri, ka bërë rreth 5 milionë euro. Ndërsa Sabaudini thotë se, ato para shkojnë për fushatë elektorale për të cilën, në fakt sipas tyre, Tahirit i duhen 20 milionë euro.
Në një tjetër përgjim, Habilaj thotë se rreth 30 mijë euro duhen si pagesë për Tahirin.
Në një pasazh tjetër Moisiu thotë se, “u ka blerë byzylykë gruas së Saimirit dhe nënës së tij”.
