Akuzave të Partisë Socialiste për kontratat lobuese që Partia Demokratike ka përdorur gjatë fushatës zgjedhore të vitit 2017 në shumën e 650 mijë eurove të cilat sipas tyre nuk janë të deklaruara dhe lejnë hije dyshimi për prejardhjen e këtyre parave, u është përgjigjur vetë Selia Blu nëpërmjet juristit të saj në KQZ. Ivi Kaso nuk ka mohuar që shuma prej 650 mijë eurosh të mos jetë e vërtetë, por ka saktësuar se këto nuk janë shpenzime të fushatës zgjedhore, por janë pagesa gjatë aktivitetit të zakonshëm politik të kësaj force dhe se këto para do të deklarohen në raportin vjetor që PD do të depozitojë në KQZ në fund të vitit 2017.
“Nuk ka asgjë të paligjshme dhe asgjë për t’u fshehur. Për sa u përket mospërputhjeve të tjera, ka kontrata konsulence që u janë vënë në dispozicion ekspertëve dhe monitoruesve të zgjedhjeve nga vetë PD-ja. Janë dhe pagesat që u janë vënë në dispozicion ekspertëve të KQZ-së nga vetë PD-ja, të cilat nuk figurojnë në raportin financiar të fushatës zgjedhore të PD-së dhe kjo për një arsye të thjeshtë, janë kontrata që nuk kanë të bëjnë me fushatën zgjedhore të subjektit zgjedhor PD. Janë pagesa që nuk lidhen në asnjë mënyrë me pagesat zgjedhore të subjektit Partia Demokratike. Janë kontrata dhe marrëveshje të cilat lidhen me aktivitetin e zakonshëm politik të subjektit Partia Demokratike. Si të tilla, ato përfshihen në raportin e përgjithshëm vjetor të vitit 2017 të PD-së”, është shprehur Kaso.
