Në ditën e 17- vjetorit të Pavarësisë së Kosovës, Shtetet e Bashkuara përmes Richard Grenell e cilësuan të padrejtë burgosjen e ish-Presidentit Hashim Thaçi.
“Ai duhet të ishte i lirë, të festonte në Prishtinë”, tha I Dërguari Special i SHBA-ve. Teksa e cilëson tejet me vend këtë deklaratë, gazetari Blendi Fevziu thekson se ndaj “Thaçit apo ish-krerëve të tjerë të UÇK-së në Hagë nuk ka asnjë akuzë për trafikim organesh”.
“Ka vetëm një akuzë, si organizatë për arsye të komandimit. S’ka asnjë akuzë që ata të kenë kryer krime vetë. Akuza kryesore e trafikimit të organeve nuk ekziston”, u shpreh ai në një lidhje për Klan News.
Tha se Ushtria Çlirimtare e Kosovës është një forcë që absolutisht nuk ka kryer krime, por ka mbrojtur popullatën e saj nga represioni i Sllobodan Millosheviçit.
“Nuk ishte burgim për drejtësinë në Kosovë, por politik. Nga ana tjetër Këshilli i Europës nuk ka në akt-akuzë asnjë çështje për trafikim organesh. Pretendohet që ka qenë vendim politik. Prokurori dhe gjykatësi kanë thënë që “kemi frikë se mos Grenell e liron Hashin Thaçin”, që është skandaloze sepse ata nuk mund të rrinë bashkë. Grenell nuk është një ish-diplomat, është i Dërguar Special i SHBA-së për çështje të nxehta në botë, kështu që në këtë aspekt, Thaçi duhet të festonte në Prishtinë dhe jo pas hekurave. UÇK është një forcë që absolutisht nuk ka kryer krime, nuk ka vepruar jashtë territorit të Kosovës, ka mbrojtur popullatën nga një dhunë dhe represion shtetëror i organizuar dhe një spastrim etnik i përgatitur nga Sllobodan Millosheviç.”
Sa i takon Gjykatës Speciale, u shpreh se në dijeninë e tij “nuk mund të zhbëhet nga Parlamenti i Kosovës”.
“Gjykatën Speciale askush nuk e kontrollon. Ligji është bërë në mënyrën më të marrë të mundshme. Nuk mund ta zhbëjë Parlamenti, bëhet vetëm me aprovimin e BE-së dhe shteteve të tjera. Natyrisht mund të tërhiqet akuza, ajo për të cilën duhet folur është që po kërkohet që drejtësia të mos ketë ndërhyrje politike.“
Hashim Thaçin, Kadri Veselin, Jakup Krasniqin dhe Rexhep Selimin i cilësoi “njerëz me kontribut të jashtëzakonshëm për Kosovën”, që asesi s’mund të harrohen.
“Hashim Thaçi apo Kadri Veseli, janë ngritur me koshiencë për të luftuar shtetin e Millosheviçit, nuk kanë qenë terroristë, po luftonin një polici që po bënte genocide. Janë ngritur publikisht për këtë, kanë qenë aleatë me NATO-n. 26 vjet pas lufte, gjithçka e ngritur është një marrëzi! Kur kam vizituar Thaçin s’kam folur për çështje që lidhen me gjykimin e tij, kam shkuar për solidaritet. Unë e di kontributin e tij në luftë dhe personave të tjerë. Jakup Krasniqi sakrifikoi jetën e tij për Kosovën. Unë s’kam pasur ndonjë raport me Rexhep Selimin, por të katërt janë njerëz me kontribut të jashtëzakonshëm për Kosovën. S’mund të harrohen njerëz të tillë! Kur flasim për histori, zhvishesh nga lufta politike. Politika e Kosovës nuk mund të shohë brenda gardhit të interesave të ditës, duhet të shohin përtej.”
“Nuk mund të njolloset lufta e UÇK-së!”, përfundoi gazetari.
Kujtojmë se Thaçi u arrestua më 5 Nëntor të vitit 2020 nga Gjykata Speciale, pasi u dorëzua vullnetarisht sapo u njoh me akuzat për krime lufte gjatë konfliktit në Kosovë dhe procesi kundër tij dhe disa udhëheqësve të tjerë të UÇK-së vijon.
