Ylli Baka, përveçse një prej këngëtarëve më të njohur në Shqipëri, është i pasionuar edhe pas futbollit. Këngëtari nga Tepelena ka vendosur të ndihmojë klubin e qytetit të vendlindjes.
Burime pranë klubit të Tepelenës kanë bërë të ditur se Baka ka depozituar në arkën e skuadrës 500 mijë lekë të vjetër që të krijohet një uniformë e re.
Presidenti i klubit dhe njëkohësisht kryebashkiak i qytetit, Tërmet Peçi, dhe trajneri Ilir Selimi e kanë falënderuar këngëtarin e njohur për shumën që ai ka derdhur për ekipin e vendlindjes. Pritet që në ditët në vijim të bëhet gati edhe uniforma e re për skuadrën e Tepelenës.
Ekipi
Skuadra prej shumë vitesh militon në Kategorinë e Dytë. Mungesa e një mbështetjeje të madhe financiare për të krijuar një skuadër cilësore, bën që Tepelena ta ketë të vështirë rikthimin në Kategorinë e Parë.
Në sezonet e fundit janë afruar edhe futbollistë të huaj, kryesisht brazilianë, por skuadra nuk ka arritur të ngjitet një kategori më lart. Mungesa e një sponsori ka krijuar këtë situatë që Tepelena ta ketë të vështirë të arrijë objektivin vetëm me ndihmën e Bashkisë.
