Pas marrjes së kontrollit të godinës së PD nga policia, Drejtori i Policisë së Tiranës, Lorenc Panganika, në një komunikim të shkurtër për gazetarët, tha se aktualisht oborri dhe selia e Partisë Demokratike janë “skenë krimi” dhe do të kryhen të gjitha veprimet procedurale.
Sipas tij, kushdo që ka përdorur akte dhune do të përgjigjen para ligjit. Ndërkohë ai informoi se një qytetar dhe një punonjës policie janë dëmtuar lehtë gjatë protestës.
“Oborri dhe selia e Partisë Demokratike konsiderohet vendngjarje. Dhe Policia e Shtetit nën drejtimin e Prokurorisë së Tiranës do kryejmë veprime procedurale në bazë të kodit të procedurës. Të gjithë ata që kanë përdorur akte dhune do mbajnë përgjegjësi para ligjit. Një punonjës policie dhe një qytetar për momentin janë të lënduar lehtë”, u shpreh Panganika.
