Skënderbeu mori kreun i vetëm pas fitores në Kukës, në fushën ku sezonin e kaluar u vendos titulli kampion. Ekipi korçar triumfoi me rezultatin 2 – 1 ndaj një kundërshtari që ka të njëjtin objektiv edhe këtë sezon. Lojtarët e Skënderbeut u shfaqën më të rrezikshëm, duke treguar se ndeshja e së enjtes me Young Boys në Europa League nuk i kishte lodhur.
Bruno Dita shënoi i pari për korçarët. Goditja e tij ishte e pakapshme për Enea Koliçin. Pak minuta më vonë Kukësit mori një penallti të kundërshtuar nga trajneri dhe lojtarët e Skënderbeut. Elis Bakaj u tregua i saktë duke barazuar rezultatin. Në pjesën e dytë lojtarët korçarë u shfaqën më kërkues dhe pak para fundit fituan një 11-metërsh. Sabjen Lilaj realizoi duke vendosur sfidën për Skënderbeun që pas 4 javësh ka 10 pikë. Nuk po ecën me të njëtin ritëm Partizani që mbetet në fund të tabelës pas barazimit pa gola me Lushnjen.
Të kuqtë nuk shfrytëzuan asnjë nga rastet e shumta të paraqitura për meritë të mbrojtjes së miqve dhe duke mos patur fat. Partizani deri më tani ka grumbulluar vetëm 2 pikë, ndërsa nuk ka shënuar ende në kampionat./Tv Klan
