Kreu i Partisë së Lirisë, Ilir Meta ka publikuar një video nga një takim i kryeministrit Rama në Kolonjë ku një djalë i ri i tregon kreut të qeverisë problemet në gjimanzin e tij.
I riu i thotë Ramës se pavarësisht investimit në gjimanz ka probleme sa i takon bazës materiale në shkollë. Sipas tij, mungojnë mjetet në laboratore, mungon interneti, palestra sipas gjimnazistit nuk funksionon siç duhet si dhe mungon një fushë futbolli. Po ashtu i riu thotë se kërkon ngritjen e një qendre rinore në Kolonjë.
Teksa publikon videon Meta thotë se kështu i del boja fasadë së investimeve të qeverisë.
“Ja si i del boja fasadës së investimeve të “Rilindjes” në Arsim përmes të vërtetave të thëna hapur nga ky nxënës kurajoz në Ersekë, të cilin censura nuk mundi ta ndalonte dot. Për shkak të Rilindjes, Arsimi sot është më i braktisur, më i politizuar dhe më i rrënuar se kurrë. Braktisja e Arsimit tregohet qartasi me mosmbështetjen buxhetore për arsimin, me investimet gjysmake, e tregon shpërfillja për mësuesit, pedagogët dhe për kërkimin shkencor.Bëhen ndërtesa për t’u dhënë tendera klientëve të Rilindjes, por nuk ka laboratorë, palestra, banka dhe mjete mësimore bashkëkohore. Për Partinë e Lirisë, Arsimi është prioritet i prioriteteve kombëtare dhe do të jetë prioriteti i parë sa herë të diskutohet Buxheti i Shtetit. Nuk ka zhvillim pa Arsim! Gjithçka për të rinjtë!”-shkruan Meta.
