TIRANË- Prokuroria gjatë hetimeve ka zbuluar skemën e mashtrimit që është përdor nga zyrtarë të Fondit dhe farmacistë për të përfituar miliona lekë që shteti i jepte për rimbursimin e ilaçeve. Janë plot 560 milionë lekë të përfituara nga këta persona për 1 vit.
Referuar dokumenteve të prokurorisë mësojmë se skema ka funksionuar në dy plane. Hysni Roçi, pronar i disa farmacive, u ka marrë liçensat drejtuesve teknikë të farmacive “Lundër”, “Bërzhitë”, “Adelina” dhe “Nutrimed”, me qëllim përfaqësimin e tyre në raportet me Fondin Rajonal të Kujdesit Shëndetësor për përfitimin e rimbursimit të ilaçeve. Nga hetimi ka rezultuar se këto farmaci, gjatë periudhës shtator 2014 – mars 2015, kanë përfituar shuma të konsiderueshme në mënyrë të padrejtë, nga rimbursimi i ilaçeve që kanë deklaruar se kanë shitur, por që në të vërtetë rezulton se nuk kanë shitur ato sasi. Madje, rezulton se kanë deklaruar si të shitura ilaçe, të cilat nuk i kanë pasur asnjëherë në dispozicion.
Drejtuesit teknikë të farmacive, të cilët janë marrë të pandehur, kanë deklaruar gjatë hetimit, se nuk kanë kryer veprime me Fondin. Por, ka rezultuar e provuar se liçensat e tyre ia kanë dhënë shtetasit Hysni Roçi, i cili, nëpërmjet mashtrimit, ka rimbursuar në llogari të tyre shuma të ndryshme dhe në këtë mënyrë, edhe drejtuesit teknikë janë përfitues të kësaj skeme mashtrimi.
Nga ana tjetër, shtetasi Pjerin Xhuvani, drejtori rajonal i Fondit të Kujdesit Shëndetësor Tiranë ka urdhëruar zyrtarë të tij për të formuluar akte fiktive kontrolli mbi këto farmaci dhe në përfundim, i ka nënshkruar aktet e kontrollit, duke i hapur rrugë në këtë mënyrë rimbursimit të padrejtë këtyre subjekteve private. Po ashtu, edhe zyrtarët e Fondit, të marrë të pandehur në këtë procedim, pavarësisht se ishin në dijeni të plotë të veprimeve të kundërligjshme, kanë nënshkruar akte kontrolle fiktive (të pakryera) për farmacitë, duke lejuar në këtë mënyrë përfitimin e padrejtë të rimbursimit monetar për subjektet private.
