Kryeqyteti grek ishte në alarm, pas arratisjes së një shqiptari dhe një shtetasi sirian nga burgu i Avlona. Por arratia e Albiano Xhezarit nuk zgjati as 24 orë, ndërsa ai konsiderohet me rrezikshmëri të lartë.
I riu shqiptar është dënuar me 16 vite burgim në Greqi për trafik droge, pasi u arrestua në Athinë në muajin Maj 2017 si pjesë e një grupi kriminal. Roli i tij ishte të merrte dhe transportonte lëndën narkotike në kufirin shqiptaro-grek.
Xhezairi rezulton person i kërkuar edhe në Shqipëri. Ai akuzohet si pjesëmarrës në vrasjen e Aleksandër Bardhit, ngjarje e ndodhur më 24 Shtator 2016 në fshatin Shëndëlli të Sarandës. Lidhur me këtë krim, në atë kohë u arrestuan dy të rinj, ndërsa Albiano Xhezairi ishte shpallur në kërkim pasi nuk ishte kapur.
Në banesën e tij policia gjeti 3 automatik model 56 dhe 3 karikatorë me fishekë, që pas ekzaminimeve laboratorike u provua se njëri prej tyre ishte përdorur për vrasjen e 47-vjeçarit Aleksandër Bardhi. Disa ditë para ekzekutimit të tij, 3 armët ishin përdorur për qitje në të njëjtin vend.
Në dhjetor të vitit 2016, Albiano Xhezairit i vrasin babain. Agron Xhezairi u ekzekutua me breshëri arme në derën e banesës së tij në Ksamil. Dyshimet janë se ai u vra për hakmarrje, pasi djali i tij është i dyshuari kryesor për vrasjen e Aleksandër Bardhit.
Shtypi grek shkruan se 23-vjeçari shqiptar është pjesë e “Mafias së burgjeve”. Ai vuante dënimin në burgun e Koridhalos dhe dyshohej si pjesëmarrës në një vrasje brenda këtij burgu. Më pas u transferua në burgun e Avlonas pas episodeve që kishin ndodhur në Koridhalo./ Opinion.al
