Ish-kryeministri Sali Berisha, në një prononcim për mediat pas mbledhjes së grupit parlamentar, ngriti pikëpyetje se pse prokurori i SPAK ndodhet në Kuvend, kur aty nuk ndodhi asnjë krim.
Gjithashtu Berisha ka deklaruar se beteja e opozitës do të finalizohet me një përgjigje mbarë popullore.
“Por a e dini ju se sot SKAP-i është në parlament, që nuk ka asnjë vepër penale. SKAP-i, një organizatë e vërtetë kriminale që komandohet nga Edi Rama, është sot në sallën e parlamentit. A ndodhi një krim për SKAP-in aty, më thoni, pyesni? Duke dëshmuar se është një vegël e verbër e Edi Ramës”, tha Berisha.
Berisha garantoi se “këtë betejë pa kthim nuk mund të ndalojë gjer në rikthimin e plotë të të drejtave kushtetuese të deputetëve në parlament”.
“Ftoj popullin opozitar ta ndjekë këtë betejë dhe natyrisht deputetët janë të lidhur pazgjidhshmërisht me popullin opozitar dhe jam i bindur se në momentin e dhënë, një përgjigje mbarë popullore, një reagim mbarë popullor do jetë finalizimi i kësaj përpjekje”, theksoi ai.
