TIRANË- Ministritë kanë realizuar 100 për qind fondet që kanë pasur në dispozicion për zyra e rikonstruksione të institucionit, por kanë djegur fondet e planifikuara për investime në rrugë dhe sektorë të tjerë të rëndësishëm.
Revista ekonomike “Monitor” publikon me fakte këtë skandal të dikastereve shqiptare, ku shihet qartë se si janë djegur fondet e alokuara për rrugët nga Ministria e Transporteve, apo fondet për kanalizimet nga Ministria e Bujqësisë.
Të dhënat janë marrë në tabelën e Thesarit të Ministrisë së Financave, ku rezulton se “në total niveli i realizimit të shpenzimeve kapitale është 76% për vitin 2015”.
Peshën më të madhe në këtë mosrealizim e mban Ministria e Transporteve, me një sërë projektesh rrugësh që ose nuk janë kryer fare, ose kanë performuar më ulët sesa plani.
Nga ana tjetër, pothuajse të gjitha Ministritë nuk janë kursyer në fondet për rikonstruksione zyrash, godinash, apo blerjen e pajisjeve.
Ministria Zhvillimit Ekonomik ka realizuar pothuajse 100% projektet e saj për rikonstruksion zyrash dhe blerjes pajisjesh laborator, fondin ‘one stop shop’ për investitorët e huaj dhe mbështetje për biznesin kreativ.
Ministria e Bujqësisë ka realizuar 100% fondet për rikonstruksionin e ambienteve të saj. Investimet për rezervuarë dhe kanale ujitëse e rehabilitime janë kryer në përgjithësi, megjithatë ka dhe projekte që nuk janë realizuar fare, si Pastrim sistemim lumi fshati Remenj-rruga Pogradec, apo Rehabilitimi i sistemit kryesor ujites te rezervuarit te Bazit. Në total, Ministria e Bujqësisë ka realizuar 91% të projekteve për investime kapitale.
Ministria e Transporteve, që ka dhe fondin më të lartë të shpenzimeve kapitale, është ajo që ka kryer dhe realizimin më të ulët, në total 73% (79 miliardë lekë, nga rreth 108 që ka pasur në dispozicion). Shumë pak projekte janë realizuar 100%, shumë të tjera as nuk kanë filluar dhe pjesa më e madhe nuk ka arritur të ryejë punimet e parashikuara. Psh “Ndertim rruga Kukes-Morine Loti2 (dy viadukte) dublimi (shtesë) ka realizuar vetëm 22% të kontratës.
Një tjetër projekt me vlerë të lartë, Sistemim Asfaltim rruga Tre Urat Leskovik, me fond 1 miliard lekë është realizuar vetëm 53%. Për sistemim Asfaltim Rruga Korce – Erseke Loti është shpenzuar vetëm 61% e fondit prej 1.9 miliardë lekësh.
Fondi i Zhvillimit Shqiptar, një tjetër institucion i rëndësishëm për projektet e infrastrukturës rrugore, ka arritur të shfrytëzojë 87% të fondeve prej 2.2 miliardë lekë që kishte në dispozicion.
Ministria e Arsimit dhe Sporteve, një tjetër institucion i rëndësishëm, që ka pasur në dispozicion 4.9 miliardë lekë, kryesisht për rikonstruksione shkollash e terrenesh, ka arritur ta realizojë atë vetëm 77%. Ndërsa fondet për trajnime dhe studim/projektime, ky institucion i ka realizuar 100%.
Ministria e Shëndetësisë ka pasur një realizim më të lartë plani të shpenzimeve kapitale, në rreth 89%.
Për ministritë e tjera, realizimi i projekteve varion dhe përgjithësisht është më i lartë se 90%.
