Skandali/ Shqiponjë apo sorrë me pupla. A e di Elvana Gjata cili është flamuri i vërtetë i Shqipërisë?

Me të drejtë Elvana Gjata mund të krenohet me këngën “Kuq e Zi, je ti”, për klikimet që kjo këngë ka marrë në youtube, por edhe këndueshmërinë e kësaj kënge tashmë të kthyer në hit te dëgjuesit. Por a e di Elvana se cili është flamuri i vërtetë i Shqipërisë dhe konkretisht cila është heraldika shoqëruese e këtij flamuri? Në një video të postuar së fundmi në profilin e saj në facebook, ku shfaqen nxënësit e kolegjit “Turgut Ozal”, Elvana krenohet së tepërmi që këta nxënës këndojnë këngën e saj “Kuq e zi, je ti”, por nuk shqetësohet aspak ose në rastin më të keq për shkak të padijes, nuk e vë re se flamuri që nxënësit shpalosin është një imitim i shëmtuar i shqiponjës dy krenare. Me padije apo me dashakeqësi organizatorët kanë zgjedhur të shpalosin një flamur ku shqiponja nuk as këmbë as bisht, por më shumë ngjan me një sorrë me dy koka dhe me pupla të çakërdisura. Se si është katandisur shqiponja dy krenare në festimet e kolegjit “Turgut Ozal”, gjithsecili mund ta shikojë në videon e mëposhtme…Por kjo video mund të vlejë si ndërgjegjësim edhe për këngëtarët krenaristë, të cilët krahas klikimeve duhet të informohen edhe më shumë për simbolet të cilëve u këndojnë, para se të bëjnë statuse të cilat mund t’i kthejnë në qesharakë dhe të paditur. /Opinion.al