Ministri i Infrastrukturës dhe Energjisë, Damian Gjiknuri, ka përfunduar dëshminë e tij tek Krimet e Rënda, pasi kallëzimit që ka bërë për abuzimet me tenderat e rrugës Tiranë-Elbasan.
Thirrja e tij për të dëshmuar në Prokurori, erdhi pas arrestimit të tre ish-zyrtarëve të ARRSH-së dhe dëshmive të ish-ministrave Edmond Haxhinasto dhe Sokol Dervishaj.
Ministri Gjiknuri është kreu i tretë i Transporteve që u pyet nga organi i akuzës. Ai përfundoi dëshminë e tij vetëm pak minuta më parë në Prokurorinë e Krimeve të Rënda.
Gjiknuri nuk foli gjatë në lidhje me dëshminë e tij, duke u shprehur para gazetarëve se nuk kishte asgjë të re për të shtuar dhe shtoi se i qëndronte asaj që është thënë në auditin e kryer.
‘Nuk kam ndonjë gjë për të shtuar. Ato gjëra që i kemi thënë në audit, ato janë. Nuk jam këtu për të bërë hetime. Ato që i kam thënë në audit, i thashë në prokurori’.
Dëmi i përllogaritur nga Prokuroria për abuzimet me tenderët dhe amendimet e kontratave me kontraktorët shkon në 37 milionë dollarë. Më herët në organin e akuzës ka dëshmuar Afrim Qendro, i komanduar si Drejtor i Autoritetit të Rrugëve.
