Skandali me pronat në bregdet, prindërit e Berishës blenë 400 metër tokë

Emri i prindërve të futbollistit Etrit Berisha është përmendur nga mediat ditën e djeshme, si blerës të 400 metrave tokë në plazhin Rana e Hedhun në Lezhë.
Pas arrestimit të zyrtarëve të bashkisë së Lezhës, mes të cilëve edhe kryebashkiaku dhe kryetari i qarkut, u bë publik fakti se në zonën e këtij plazhi janë tjetërsuar sipërfaqe të tëra toke, të cilat më pas janë shitur.
Prindërit e portierit Berisha, siç bën me dije Report TV mendohet se e kanë blerë tokën pikërisht nga këta persona, por pa ditur që prona kishte probleme.
Sipas të njëjtit burim që citon banorët e zonës, ata janë shprehur se tokën e kanë gjetur me çmim të lirë.
Sikurse është bërë më dije deri në këto momente, pas tjetërsimit që këtyre pronave u është bërë ato janë shitur me shpejtësi dhe me çmim shumë më të lirë se tregu, në mënyrë që të humbisnin gjurmët. Deri tani janë më shumë se 23 persona të përfshirë në hetim./ Opinion.al