Kryeministri kanadez Justin Trudeau ka emëruar deputeten e Partisë Liberale, Joyce Murray si Ministre të Thesarit. Emërimi i 64-vjeçares vjen pas një sërë largimesh nga qeveria, për shkak të çështjes “SNC-Lavalin”, një skandal korruptiv që ka përfshirë një kompani pranë Trudeau dhe mazhorancës liberale. Mendohet se Trudeau ka përdorur pushtetin e tij për t’i bërë presion ministrave përkatës që të mbyllnin hetimet.
Joyce Murray zë vendin e Jane Philpott e cila dha dorëheqjen 4 marsin e shkuar. Ministria e Thesarit është përgjegjëse për të kontrolluar dhe për të miratuar shpenzimet e qeverisë.
Në muajt e shkuar, skandali solli dorëheqjen e dy ministrave të tjerë, të Jody Wilson-Raybould, Ministre e Veteranëve të Luftës që më parë kishte mbajtur postin e Ministres së Drejtësisë, dhe të Scott Brison, që kishte drejtuar Ministrinë e Thesarit përpara Philpott, duke u dorëhequr në mes të janarit.
Kanadaja është në prag të zgjedhjeve të përgjithshme, ndërsa opozita vazhdimisht i ka kërkuar dorëheqjen edhe kryeministrit Trudeau./Opinion.al
