Paraburgimi i eurodeputetëve Eva Kaili dhe Marc Tarabella, të cilët akuzohen si të përfshirë në skemën e parave për favor që ka përfshirë Parlamentin Evropian, u zgjat të premten nga autoritetet belge.
Eurodeputetes greke Kaili, e cila u arrestua dhe u burgos në fillim të dhjetorit, i është zgjatur paraburgimi me dy muaj, njoftoi zyra e prokurorit federal. Homologu i saj belg do të dalë sërish para gjyqtarëve pas një muaji.
Të dy janë akuzuar për pjesëmarrje në një organizatë kriminale, korrupsion dhe pastrim parash, si pjesë e një hetimi mbi lobimin e paligjshëm të kryer nga Katari dhe Maroku në një përpjekje për të ndikuar në vendimmarrjen e BE-së.
Avokati i Tarabellës, Maxim Töller, përsëriti në një deklaratë se klienti i tij është “një njeri i pafajshëm” dhe e quajti ndalimin e tij të vazhdueshëm si “të vështirë për t’u pranuar”./Opinion.al
