Një skandal i vërtetë ka ndodhur në Islandë, ku një familje shqiptare me dy fëmijë të vegjël është dëbuar pas mesnate nga autoritetet islandeze.
Sipas gazetës islandeze “Iceland Monitor”, familja, me gjithë kundërshtinë e komunitetit, është dëbuar nga Islanda dhe në orën katër të mëngjesit la aeroportin e Rekjavikut.
Gjithashtu, sipas gazetës islandeze, janë dëbuar edhe disa shqiptarë të tjerë që kërkonin azil në Islandë.
Dëbimi i familjes shqiptare ka ngjallur reagime të ashpra në radhët e komunitetit në Islandë. Sipas tyre, familja e Kastriot dhe Xhulia Pepës kanë dy fëmijë të moshave 3 dhe 5 vjeç.
Ata ishin përshtatur në komunitet dhe Kastrioti kishte kohë që punonte për një firmë ndërtimi në Rekjavik. Punën ai e kishte gjetur përmes një avokati, i njohur si Herman Regnarson, i cili ka kundërshtuar fort dëbimin e familjes për në Shqipëri.
Ai ka thënë për mediat në Islandë se ka në plan të vijë në Shqipëri dhe të vizitojë familjen verën që vjen.
I pyetur nëse mori pjesë në dëbimin e familjes shqiptare gjatë orëve të para të mëngjesit të sotëm, ai u përgjigj se e dinte që do të ndodhte, por se nuk mund të merrte pjesë në një skenë të tillë tragjike.
Nga ana tjetër, Kastrioti ka thënë më herët për autoritetet se në Shqipëri i kanoset jeta për shkak të një kushëriri.
Djali i tij i vogël, ndërkohë, vuan nga një sëmundje e rëndë, fibroza cistike dhe sapo kishte nisur të mjekohej në Islandë.
Mjekime të tilla, sipas tij, në Shqipëri nuk ka. Aktualisht, familja shqiptare ndodhet në Gjermani dhe po pret që të kthehet në Shqipërisë së bashku me një grup të tjerë shqiptarësh.
http://www.dailymotion.com/video/x3hnmmn_familja-shqiptare-debohet-me-force-nga-islanda_news
