Në selinë e Partisë Demokratike, Lulzim Basha ka mbledhur paraditen e kësaj të marte, kryetarët e partive aleate të opozitës. Mbledhja po vazhdon edhe në këto momente. Sakaq, zyra e shtypit ka njoftuar se pas takimit me aleatet kryetari Basha do te kete deklarate per gazetaret.
Paraprakisht opinion.al ka mësuar se aleatët po diskutojnë që aksioni i radhës të jenë protestat. Ato pritet të nisin javën e ardhshme.
Prej ditësh, Partia Demokratike ka denoncuar një skandal të ministrit të Brendshëm. Ditë pas dite ajo ka treguar se vëllai i ministrit, shtetasi Agron (Geron) Xhafaj e ka vazhduar aktivitetin kriminal të tregitsë së drogës edhe vitet e fundit. Kujtojmë se vite më parë ai ka qenë i dënuar në Itali me 7 vite burg për trafik të drogërave të forta. Pas denoncimeve të PD, Agron Xhafaj u detyrua të nisej për në Itali për të vuajtur dënimin.
Por, opozita nuk ndalet! Ajo thotë se ministri i Brendshëm duhet të largohet, pasi i vëllai ka vazhduar aktivitetin kriminal edhe gjatë kohës që Xhafaj ka ushtruar detyrën e rëndësishme. Për këtë ka shfaqur një audipërgjim të vëllait të ministrit, ndërsa dje ka nxjerr me zë dhe figurë dëshmitarin që tregon aktivitetin kriminal të Agron Xhafës.
/Opinion.al
