Policia kufitare e Rinasit ka ndaluar sot në aeroport, teksa hynte nga Italia në Shqipëri, Gani Manolllarin.
Manollari është biznesmeni që denoncoi skandalin e korrupsionit në prokurori. Policia shoqëroi biznesmenin për ta marrë në pyetje, thonë burimet, ndërsa ende nuk ka njoftim zyrtar nëse ka ndonjë akuzë ndaj tij.
Video e publikuar në “Stop” shkaktoi një skandal të vertetë, pasi u filmua oficeri i policisë gjyqësore, Fatos Lusha duke marrë plot 18 mijë euro për ti liruar llogaritë bankare biznesmenit.
Në këtë video-skandal, Lusha u filmua, teksa thoshte se paratë i kishte për prokurorin Ardian Braho. Ndërsa oficeri Lusha është zhdukur që prej 28 shtatorit kur u transmetua video-skandali.
Ai akuzohet për korrupsion dhe shpërdorim detyre dhe është caktuar masa arrest me burg në mungesë. Ndërsa prokurori është i pezulluar nga detyra deri në përfundimin e hetimeve mbi rastin korruptiv.
Biznesmeni Manollari kishte në llogari 150 mijë euro të cilat i kishin ardhur përmes një transferte nga Monako. Kjo shumë mbahej e bllokuar prej dy vitesh (2014-216) edhe pse ishte vertetuar se nuk janë “para të pista”. Biznesmeni denoncoi përmes kameras së fshehtë në “Stop” se ka dhënë plot 18 mijë euro që prokuroria të hiqte sekuestron nga llogaria e tij.
