Prokuroria pritet të marrë në pyetje biznesmenin që dha 18 mijë euro ryshfet te oficeri i prokurorisë Fatos Lushi, për të liruar një llogari bankare të pastër.
Burime nga grupi hetimor thanë se janë duke e kërkuar atë, por ende nuk janë vënë në kontakt për shkak se prej pak kohësh ai jeton jashtë. Por në një inervistë për emisionin “STOP”, në Televizionin Klan, biznesmeni në fjalë tha se ishte i gatshëm të ndihmonte hetimet.
A je i gatshëm ti t’i thuash gjithë këto gjëra edhe para prokurorit që ka marrë çështjen në shqyrtim?
Qytetari: Po, po. Unë jam i gatshëm t’i them të gjitha. Unë dëgjoj në televizion që personi është në kërkim. Unë der sot nuk di asnjë fjalë nuk më ka kërku kurkush.
Sa kohë ke që jeton jashtë shtetit?
Qytetari: Unë jashtë shtetit nga 92-shi kam shku në Greqi deri në 98-ën. Nga 98-a e deri më sot, jam në Itali
Ai ka rrëfyer edhe një herë peripecitë që kaloi për zhbllokimin e kredisë së tij derisa u detyruar të paguante ryshfet për të arritur qëllimin.
Qytetari: M’i bllokuan në Gusht të 2014. Në 12.01.2015 ka shkuar në shkallë të parë.
Ke bërë gjyq? Ke vajtur dhe në shkallë të parë?
Qytetari: Edhe në shkallë të dytë. Në shkallë të dytë është me 09.11.2015.
Ai këmbëngul se paratë i janë kërkuar në emër të të dy punonjësve të prokurorisë, duke përfshirë edhe prokurorin Ardian Braho, që i ka mohuar akuzat.
Qytetari: Kur shkova këta u takun bashkë në një kafe aty matanë, unë i shifsha nga larg. U takun në një kafe (prokurori – Fatosi) në një kafe pa u fut mrena. Më mrapa unë prita saqë të dalin e pyta (Fatosin).
Qytetari: Tha m’kanë thanë 20 mijë euro, se këtu punohet me përqindje.
Si të tha oficeri i policisë gjyqësore, fola me prokurorin dhe sa jep ti?
Qytetari: Po. Unë i thashë nuk di se ça të jap.
Pastaj oficeri të tha këtu punohet me..?
Qytetari: Përqindje.
Qytetari: Po. Në fakt 20 mijë më kanë kërku.
Prokuroria për Krimet e Rënda ka nisur një hetim pasuror për oficerin e Prokurorisë së Tiranës, Fatos Lushi, për të parë nëse ai i justifikon, duke krahasuar ato me të ardhurat mujore të tij.
Në sitën e këtij hetimi do të kalojnë dhe pasuritë e e paluajtshme të oficerit dhe familjarëve të tij. Veprime po kryhen edhe ndaj prokurorit Ardian Braho, i cili deri në këto momente nuk ka cilësinë personit në hetim. /tv Klan
