Në skandalin botëror të Panamasë për fshehjen e të ardhurave u zbulua se ishin edhe dy kompani shqiptare, me 3 përfitues dhe 22 pronarë aksionesh. Haaretz.com ka mundur të zbulojë edhe emrin e njërit prej personave nga Shqipëria që bën pjesë në listën e ‘Panama Papers’.
Bëhet fjalë për një biznes të quajtur ‘GFI Technologies’ i regjistruar në maj të 2013-s në ishullin Anguila, për të investuar në Shqipëri në kompanitë shqiptare të teknologjisë së lartë. Në shkrim përmendet emri i një avokati të quajtur Assaf Halkin, ku theksohet që është shtetas shqiptar dhe në vendin tonë njihet me emrin Ismail Mulati.
Ai, së bashku me një firmë kanadeze ‘Global Fluids International S.A’, janë pronarët e kompanisë ‘GFI Technologies’. Mulati nuk iu përgjigj pyetje së Haaretz.com në lidhje me investimet e kompanisë, por komentoi se qëllimi i biznesit është për të shitur pajisje teknologjike në fushën e karburanteve dhe shtoi se të gjitha të ardhurat raportohen në organet tatimore izraelite.
Lajmi i bujshëm i mediave ndërkombëtare që zbuloi emra të politikanëve botërorë dhe figurave publike që fshehin paratë në Panama për të shmangur detyrimet nga taksat, ka nxjerrë në pah se në këto lista të bëra publike janë edhe personazhe shqiptarë.
Bëhet fjalë për dy kompani nga Shqipëria që kanë fshehur paratë në Panama, vend që konsiderohet si parajsë fiskale për shkak të kompanive off-shore që nuk bëhet deklarimi.
