Ish-guvernatori, Ardian Fullani do marrë 56 paga dëmshpërblim nga Banka e Shqipërisë. Është ky vendimi që dha Gjykata Administrative e shkallës së Dytë, pas pasdisë që ish-guvernatori kishte bërë për shkarkim të paligjshëm nga puna. Gjykata ndërkohë, ka rrëzuar kërkesën për rikthim në detyrën të Fullanit.
Në fillim Fullani u dëmshpërblye me 12 paga mujore, por apeloi vendimin dhe fitoi plot 56 paga e barabartë me 4.5 vite pune. Avokatët e Bankës i kërkuan Gjykatës të mos e pranojë padinë e ish-Guvernatorit. Sipas juristit, padia në Administrative është depozituar tej afateve ligjore, raporton gazeta Shekulli.
“Kanë kaluar gati 120 ditë nga koha kur paditësi ka mësuar për vendimin e Këshillit Mbikëqyrës për shkarkimin nga detyra dhe deri në momentin që i është drejtuar Gjykatës. Të mos pranohet padia për shkak të mospërmbushjes së kushteve formale të saj”, u shpreh ai.
Në lidhje me kërkesën e paditësit Fullani për dëm moral, juristi i BSH pretendoi se ish-Guvernatori është shkarkuar konform procedurave, për shkak të shkeljeve ligjore gjatë ushtrimit të detyrës dhe jo për shkak të dyshimeve për përfshirje në skandalin e vjedhjes në Bankën e Shqipërisë.
Pretendimet e tyre u kundërshtuan nga avokatët e Fullanit, Maks Haxhia dhe Erinda Ballanca. “Në kërkojmë pavlefshmëri absolute të aktit administrativ të Këshillit Mbikëqyrës dhe kjo nuk ka afat. Në lidhje me dënim jopasuror të pretenduar prej nesh, shkarkimi nga detyra i ish-Guvernatorit është bërë për shkak të masës së sigurisë ‘arrest në burg’ të caktuar ndaj tij. Nëse nuk do të ishte caktuar kjo masë, ai nuk do të ishte shkarkuar dhe do të vijonte edhe sot të ishte Guvernator i Bankës së Shqipërisë”, thanë mbrojtësit ligjorë të tij.
