Dy futbollistët që luajnë me Kombëtaren Italiane, Sandro Tonali dhe Nikolo Zaniolo u morën në pyetje nga policia në pasi dyshohen se kanë shkelur rregullat duke vendosur baste.
ANSA raportoi se Tonali dhe Zaniolo ishin intervistuar si pjesë e një hetimi bastesh që po kryhej nga Zyra e Prokurorit Publik të Torinos. Hetuesit dyshojnë se Zaniolo ka vënë baste në sfidat e Romës në Kupën e Italisë, ndërsa Tonali për përballjet ku ka qenë vetë në fushë.
Në një deklaratë, Federata Italiane e Futbollit (FIGC) tha:
“Federata njofton se pasditen e sotme Prokuroria Publike e Torinos ka kryer hetime për lojtarët, Sandro Tonali dhe Nicolo Zaniolo, të cilët aktualisht po stërviten me kombëtaren në qendrën stërvitore të Covercianos. Pavarësisht natyrës së ngjarjeve, duke pasur parasysh se dy lojtarët nuk janë në gjendjen e duhur për t’u përballur me ndeshjet e planifikuara për ditët në vijim. Federata ka vendosur që edhe për mbrojtjen e tyre t’i lejojë ata të kthehen në klubet e tyre përkatëse.”
Skuadra e Luciano Spallettit do të përballet me ndeshjet kualifikuese të Euro 2024 kundër Maltës të shtunën dhe Anglisë të martën e ardhshme.
Lojërat e fatit janë të ligjshme në Itali për sa kohë që zhvillohen në platforma të njohura nga agjencia e Doganave dhe Monopoleve.
Veprat penale që lidhen me lojërat e fatit me mjete të palicencuara mund të dënohen me burgim prej tre muajsh ose me gjobë nga 51,000 € (53,686 dollarë) deri në 516,000 €./Opinion.al
