Vetëm 3 javë pas arrestimit të Nadir Çaushollit për skandalin e barnave të rimbursueshme, një letër ka mbërritur në adresë të të atit, Fatos Çausholli nga ministri i Financave, Shkëlqim Cani. Ai i falenderon pronarët e kompanisë “Omega Pharma” për modelin që ofrojnë, duke paguar taksat….
Nadir Çausholli është në paraburgim që nga 31 tetori i këtij viti, pasi akuzohet për aferën e medikamenteve që kap shifrat e 2.2 milionë eurove, ndërsa Cani i dërgoi letër babait të tij, Fatos Çaushollit, më 17 nëntor, duke ua cilësuar kompaninë si “Një model i ndershëm dhe i rregullt i sipërmarrjes”.
Në letër thuhet: “Dëshiroj t’ju shpreh mirënjohjen e sinqertë për promovimin që i bëni modelit të ndershëm dhe të rregullt të sipërmarrjes në Shqipëri. Lufta që qeveria jonë i ka shpallur informalitetit, nuk synon vetëm mbledhjen e më shumë kontributeve dhe të ardhurave, por, në radhë të parë, kërkon të krijojë kushtet e konkurrencës së ndershme, ku të gjithë sipërmarrësit trajtohen në mënyrë të barabartë përpara rregullave dhe ligjit”.
“Unë dëshiroj jo vetëm t’ju falënderoj për kontributin që keni dhënë dhe vazhdoni të jepni përmes taksave që paguani, por edhe t’ju inkurajoj që të vazhdoni të respektoni institucionet shtetërore. Unë jam besimplotë se vetëm duke luftuar informalitetin pa kompromis, ne do të arrijmë të nxisim edhe më shumë zhvillimin ekonomik e do të krijojmë së bashku një mjedis sa më të përshtatshëm për të bërë biznes”, shkruan Cani për familjen Çausholli. /gazeta shqip/
