Drejtori i Operatorit të Sistemit të Transmetimit, Klodian Gradeci dha sot dorëheqjen.
Dorëheqja e tij vjen disa kohë pasi OST u përfshi në skandalin e Unazës së Re, pasi “DH Albania”, e cila rezultoi një kompani fantazmë mori një tender miliona eurosh për linjën energjetike.
Skandali me kompaninë Dunwell Haberman, nisi me shpalljen fituese për ndërtimin e një pjese të Unazës se Madhe, por aktiviteti ndërtimor i kesaj kompanie u pezullua nga Autoriteti Rrugor Shqiptar pas publikimit të dokumenteve.
Gjithsesi Klodian Gradeci, shkroi në letrën e tij se dorëheqja vjen për arsye personale.
LETRA
Drejtuar: Z.Pajtim Bello, Kryetar i Këshillit Mbikëqyrës të OSHT SHA
I nderuar Z.Kryetar,
Unë i nënshkruari Klodian Gradeci, që nga data 21.09.2017 mbaj detyrën e Administratorit të OST sh.a.
Nëpërmjet kësaj kërkese, po ju paraqes dorëheqjen time të parevokueshme nga ky funksion që unë mbaj pranë shoqërisë “OST” sha, për arsye personale, duke filluar nga dt.21.01.2019.
Gjatë kësaj periudhe që kam punuar pranë shoqërisë, kam pasur mundësinë që të kontribuoja sado pak në ngritjen e saj, duke punuar me një staf të përkushtuar dhe bashkëpunues, ku së bashku kemi arritur rezultate mjaft të mira për shoqërinë.
Duke ju falënderuar paraprakisht Juve dhe stafin e OST sha.
