Hije skandali bien mbi një letër-peticion, që u dha se është firmos nga 65 artistë që binin dakord për ndërtimin e teatrit të ri dhe shembjen e ekzistuesit. Mes emrave të firmëtare është edhe regjisori veteran i Teatrit Kombëtar Pirro Mani dhe bashkëshortja e tij, aktorja po ashtu e njohur Pavlina Mani.
Një ditë pas publikimit të kësaj letre, gazeta Shekulli ka marrë në intervistë aktoren Pavlina Mani, e cila ka deklaruar se “as ajo as bashkëshorti i saj nuk kanë hedhur asnjë firmë në letrën për teatrin. Pavlina Mani kërkon që të mos e përgojojnë emrin e tyre pasi nuk merren me politikë dhe për më tepër që Pirro Mani ka vite që është larguar nga Shqipëria.
“Përderisa në këtë punë ka futur hundët politika, ne nuk prononcohemi për asgjë. Pirro Mani ka 10 vjet që s’ka lëvizur nga Amerika. E çfarë firme mund të ketë vënë ai kur s’është këtu?! Lereni të qetë se është në fund të viteve të jetës së tij, është i sëmurë. Ne nuk merremi me këto gjëra, aty në plan të parë nuk është çështja te ndërtimi i teatrit, aty bëhet luftë politike, ne jemi kundër politikës. Me asnjë parti nuk jemi, si Pirro si unë. Ne jemi artistë, nuk jemi politikanë. Ne jemi për teatër, të ekzistojë teatri. Të ekzistojë edhe një teatër i ri, godinë e re, të ekzistojnë 2-3 teatro siç e ka gjithë bota”, është shprehur Pavlina Mani.
Çfarë përmbante peticioni
Ditën e djeshme në disa media u publikua një letër që i është nisur Presidentit, Meta, Kryeparlamentarit Ruçi, Kryeministrit Rama dhe kryebashkiakut Veliaj.
Aty shkruhej se: Ne artistët firmëtarë shprehim dakordësinë tonë dhe nevojën urgjente për një godinë të re të Teatrit Kombëtar, një godinë e cila t’u shërbejë artistëve dhe mbi të gjitha publikut, i cili edhe pse në kushte tërësisht të papërshtatshme, për asnjë moment nuk e ka braktisur skenën e teatrit.
Ne artistët e skenës, shprehim vullnetin dhe njëkohësisht edhe kërkesën, në funksion edhe të transparencës që i shërben forcimit të besimit në këtë proces, për përfshirjen tonë në mënyrë të domosdoshme në komisionin e negocimit që do të ngrihet për zhvillimin e projektit të ri, me qëllim për të qënë pjesë e vendimmarrjes që ka të bëjë me ngritjen e godinës së re të Teatrit Kombëtar”.
/Opinion.al
