Një shqiptar i arrestuar pak ditë më parë me një sasi të madhe, prej 30 kilogramësh heroinë e më shumë se 130 mijë euro me vete është lënë i lirë, për një gabim të drejtësisë italiane.
Skandali është bërë i ditur nga mediat italiane të cilat bëjnë të ditur se, shqiptari identifikuar me emrin Dario Myftiu ose i njohur dhe me emrin Aurel Hoxha, 37 vjeç kishte lënë qelinë pak më shumë se 1 javë pas ndalimit.
Ai ishte vendosur në pranga në 26 gusht nga policia në Padova ku i ishte gjetur sasia e madhe e drogës dhe paratë.
“Një boss i mafias shqiptare është lënë i lirë për shkak të një gabimi: Një çështje teknike burokratike”,- shkruan “Il Gazetino”. Shqiptari 37-vjeçar në vitin 2008 ishte identifikuar si pronari i një laboratori droge në Bergamo.
Ai ishte kapur në vitin 2008, por më pas kishte marrë një dekret për përjashtimin e tij nga Italia deri në 2022, por sigurisht që ai nuk ishte larguar. Në fund të gushtit policia e kishte gjetur sërish dhe e kishte vënë në pranga, pasi i ishte gjetur droga, paratë e sende të tjera.
Ai ishte ndaluar nga policia ndërsa po udhëtonte me një makinë “Polo”.
