Jacinda Ardern ka tronditur Zelandën e Re duke njoftuar se do të largohet nga posti i kryeministres pas pesë vitesh e gjysmë me argumentin se nuk ka më fuqi për të udhëhequr.
Duke u shfaqur mes lotësh në një konferencë shtypi, Ardern tha se “politikanët janë njerëz” dhe njoftoi se ajo kishte vendosur të largohej deri më 7 shkurt dhe të mos kërkonte rizgjedhje.
Arden, 42-vjeçare, ka deklaruar ndër të tjera se gjatë pushimeve verore ka pasur kohë që të analizojë të ardhmen e saj, duke shpresuar se do të gjejë energji për të vazhduar.
“Fatkeqësisht nuk e kam gjetur, dhe unë do t’i bëja shërbim të keq Zelandës së Re nëse do të vazhdoja”, u ka thënë ajo gazetarëve.
Ardern u zgjodh kryeministre në moshën 37-vjeçare në vitin 2017. Ajo udhëhoqi Zelandën e Re përgjatë pandemisë së koronavirusit, të shtënave në xhamitë në Kristçërç, dhe në kohën e një shpërthimi vullkanik.
