Mediat italiane kanë publikuar pamjet e ndjekjes dhe kapjes së një skafi. Në skaf u sekuestruan mbi 1.7 ton drogë dhe u arrestuan dy shqiptarë.
Sipas “Guardia di Finanzia-s”, ky operacion është ekzekutuar nga reparti ajor detar i financës italiane të rajonit të Puglias. Molisses e Abruzzos.
Si u realizua kapja e mjetit
Rojat bregdetare e kanë pikasur gomonen gjatë natës, pasi lundronte me shpejtësi. Në bordin e mjetit ishin të dukshme pakot me ngarkesë të dyshimtë.
Mjetet lundruese të forcave italiane janë vënë në ndjekje të gomones. Skafistët nuk i janë përgjigjur urdhrit të ndalimit, por janë përpjekur të largohen duke shtuar shpejtësinë. Më pas kanë hedhur në ujë disa prej pakove që kishin në bord.
Pas një ndjekje të shkurtër, është bërë i mundur ndalimi i gomones në ujërat pranë provincës së Foxhias.
Sakaq, policia italiane ka sekuestruar gomomen 10 metra të gjatë e me dy motorë të fuqishëm, në bordin e së cilës u gjetën 104 pako të madhësive të ndryshme me rreth 1 718 kg marijuanë. Në pranga janë vënë dy skafistët shqiptarë, ndërsa policia shqiptare zbuloi se të arrestuarit janë të identifikuar me inicialet A.L. 38 vjeç dhe A.A 36 vjeç.
Policia italiane informon se prej fillimit të vitit 2018 e deri më sot vetëm në rajonin e Puglias janë sekuestruar 15 mjete lundruese me drogë, janë arrestuar 37 skafistë dhe janë sekuestruar 16 tonë marijuanë.
Por sipas policisë shqiptare, nisur nga hetimet e deritanishme nga policitë e vendeve partnere, mjeti lundrues nuk është nisur nga brigjet shqiptare, ndërkohë në njoftimin e GF nuk përcaktohet pikënisja.
Megjithatë Policia e Shtetit po vijon shkëmbimin e informacionit me agjencitë partnere për të hetuar mbi lidhjet e të ndaluarve si persona të përfshië në këtë veprimtari kriminale./Opinion.al
